Am 28. Juni 1967 isch dr Jodlerklub „Bärgbrünneli“ im Restaurant Frohsinn in Willadingen is Läbe grüeft worde. Als Tagespräsidänt und anschliessend als erste Präsidänt het dr Fritz Hofer g'amtet.
Die Gründigsversammlig het sich zwüschem Name Jodlerklub „Fengelberg“ u Jodlerklub „Bärgbrünneli“ müesse entscheide. Dir wüsst uf was das die Wahl gfaue isch. Als erste Dirigänt het dr Ernst Flury d Singleitig übernoh.

Dr Jodlerklub „Bärgbrünneli“ Koppigen het sithär vieli Erfolge u Höhepunkte chönne fyre u gniesse. Bsungers si sicher die beide Tonträger-Produktione. Unger dr Leitig vom Fritz Hofer isch e Musikkassette entstange u im Johr 1999 e CD „Sing mit“ unger dr Leitig vom Paul Meier.

I de Statute vo dr Gründigsversammlig steit im Artiku „Ziel und Zweck“: „....... die alte schweizerische Eigenart zu wahren und das nationale Brauchtum, insbesondere den Jodelgesang zu erhalten und zu fördern .... die kameradschaftliche Geselligkeit zu pflegen.... .“ Dä Leitgedanke het i dr hütige, meist gstresste u hektische Zyt nüt a Gültigkeit verlore. Im Gegenteil! Zu de wüchentliche Singprobe am Mittwuch am 8 bis am 10 träffe sich hüt 18 Jodler u 3 Jodlerinnen, unger dr Leitig vom Stefan Müller, us dr nächere u wytere Umgäbig. Mir sträbe a, Althärbrachts z pflege u vor Nöiem d Ohre nid z verschliesse. Ou erwähnenswärt si die viele Fescht, Umzüg u uswärtige Konzärtuftritte.