Am Fritig, 23. Jänner isches ume sowyt gsy, üsi Houptversammlig isch vor dr Türe gstange. Mir hei üs im Restaurant Rössli in Utzenstorf troffe.

Äs feins Menü isch üs serviert worde; Grüene Salat u när Rindszunge mit Härdöpfustock oder alternativ Fleischchügeli mit Härdöpfustock (für die, wo nid so gärn Zunge hei) Danke Andrea u Team für's Gaschträcht u das herrleche Ässe! Äs isch wie gäng, wunderbar gsy!

Mit chli Verspätig hei mir de üsi Houptversammlig chönne starte, 10 Traktande het es gäh.. Eis vo dene Traktande sy Mutatione. Erfröilecherwys hei mir das Johr drü nöii Mitglieder dörfe i üsne Reihe ufnäh; Katrin Bernhard im 1. Tenor u 2. Jutz, dr Jakob Scheuner im 2. Tenor u dr Clemens Hügin im 1. Bass! Schön, stöht dir i üsne Reihe, mir hei fescht Fröid!

Leider hei mir aber ou drei Ustritte gha, was üs ganz fescht röit! Dr Erwin Huber het scho längeri Zyt mit dr Stimm Problem, Tön hei nüme weue ahänke u so het är sich entschiede, aus Aktivmitglied zrügg z'trätte. Äs röit üs aui fescht, isch är doch 34 Johr ä tröie Sänger im Jodlerklub Bärgbrünneli gsy! Liebe Erwin, mir danke Dir no einisch ganz härzlech für aus wo Du für üs - u mit üs hesch gmacht, Du wirsch üs fähle! Faus es Dir de sött längwylig wärde u mir Dir ou chli fähle, so chumm eifach de wieder!

Ou dr Jascha Zürcher het sich entschlosse, dass är nüme aktiv aus Sänger möcht derby sy. Äs röit üs aui sehr, so ä flotte junge Sänger z'verlüre! Liebe Jäscheli, ou für Di giut; üsi Türe sy gäng offe für Di!

Jo äbe, de isch ab däm Johr ou dr Ronny Straub nüme aus Aktiv-Mitglied derby. Sini gsundheitlechi Situation erloubt es ihm nid, dass är aktiv cha a d'Probe cho, wiu mir im Estrich vom aute Schuelhus Probe hei. Aber liebe Ronny, Du weisch, Du bisch jederzyt härzlech wiukomme by üs u mir hei gäng Fröid, we Du chasch cho!

De sy no 9 witeri Traktande z'bespräche gsy; d'Johresrächnig wo üse Kassier, dr Röbu hervorragend het gfühert, danke Röbu! Ä wunderbare Johrebricht vo üsem Presi Chrigu hei mir dörfe lose, eifach ä Bricht zum hingere lige u gniesse, danke Chrigu! Ou üse Dirigänt dr Stefan het paar Wort gseit; chli meh doheime Wort üebe, lose u spychere u när ou umsetze was är üs gäng wieder seit, de chunnts guet. Danke Stefan ou für Diner Wort! Hesch no dra däicht, hür steisch Du scho s'eufte Johr voredra aus Dirigänt! Mir Bärgrbünneler danke Dir vo Härze für Diner Närve us Drahtseili, Dini tolli u humorvoui Art u dass Du scho syt 10 Johr dä rächt wyt Wäg uf Di nimsch, für mit üs cho z'probe! Mir hoffe u fröie üs uf wyteri 10 Johr! 

Jo de het es ou no Ehrige gäh u äs rächt gfüllts Tätigkeitsprogramm zum bespräche u gnähmige. De z'lescht het es ou no dises u äis gäh z'rede im letschte Traktandum Verschiedenes. U de isch üsi Houptversammlig öppe am haubi Eufi fertig gsy. Chrigu, nächscht Johr schaffsch es de, dass mir am Zähni fertig sy, auso Gas gäh! (chli Gspass muess sy)

När het es doch no chly Zyt gäh, zum gmüetlech zäme sy u prichte. Danke Andrea für's APPIZÄUER wo mir när hei dörfe gniesse.

So u jtz fröie mir üs ufnes schöns u erfrougrichs Jodlerjohr u villicht gseh mir Öich Läser am einte oder angere Alass wo mir derby sy!

Bis gly, öier Bärgbrünnler