Am 6. u 7. Juli si mir Bärgbrünneler uf Mümliswil as 31. Nordweschtschwyzerische Jodlerfescht greiset. Do mir bereits am eidg. Jodlerfescht z’Basel im 2020 dörfe teilnäh, isches uf dr Hand gläge, dass mir id’Heimat vo üsem Dirigänt am Stefan Müller wärde goh.

Gspannt si mir gsi uf die Mümliswiler u scho gly hei mir gmerkt, dass das Fescht mit ganz viu Härzbluet isch vorbereitet u düregfüehrt worde.

Wo mir s’erscht Mou ygsunge hei verusse, si mir überrascht worde vore Flugshow vo de Patrouille Suisse. Schön isches gsi, aber wie mir de vernoh hei, wär die Show fürs Nochberdorf planet gsi.

Am 13.36 isches de sowyt gsi. Mit Fröid u zum Teu villich e chly Härzchlopfe hei mir üs uf dr Bühni parat gmacht u üses Lied «e Handvoll Heimatärde» vom Hannes Fuhrer am fasch voubsetzte Saal dörfe Vorträge. Scho lang isches üsem Ruedi si Wunsch gsi, mit däm Lied anes Fescht z’goh u rächt het är gha. Mit guetem Gfüehl u ganz viu Applous hei mir churz druf d’Bühni wieder verloh.

Ändlech hei mir dörfe ahstosse u si i 2. Teil vo däm Fescht gstartet. S’Jodlerdorf isch wunderschön Ufboue gsi u das het bestimmt ou zur überus guete Stimmig ufem ganze Areal bytreit. Bis i die früeche Morgestunde hei mirs luschtig gha, gjutzet u glachet. Wo mir de am Sunnti no d’Note 1, es «sehr guet» für üses Lied hei dörfe entgäge näh het üsi Fröid keni Gränze meh gha. Das hei mir de bi prächtigem Sunneschyn dörfe fyre, bis mir üs de am Nomittag uf d’Heireis i Richtig Ämmitau hei gmacht. Schön isches gsi, so schnäu wärde mir das Fescht nid vergässe.