Am Fritig am 17. Januar 2020 hei mir üsi jährlichi Houptversammlig im Bahnhöfli ds Wynige abghaute. Gschtartet miteme feine Rahmschnitzu.

Gemäss der Traktandelischte het üs der Presi zügig dür die Pünkt gleitet.

Sowohl d'Jahresrächnig als ou d'Brichte vom Presi u vom Dirigänt si mit Aplous gnähmiget worde.

Zwöi Vostandsmitglieder hei nach langjähriger Tätigkeit demissioniert.

Monika Wirth aus Sekretärin u der Kurt Jaquemai aus Bisitzer.

Öich zwöine no einisch ganz härzleche Dank für Öi gleischteti Arbeit. Dir heit Öi Sach guet gmacht.

Erfröilicherwis het der Presi nid lang müesse sueche. Mit der Susanne Leuenberger aus Sekretärin u am Marc Kohler aus Bisitzer hei die Lückene problemlos chönne gschlosse wärde. (Bild vom Vorstand)

Mir wünsche Öich viu Befriedigung bi dere Tätigkeit.

Ou bim Traktandum Tätigkeitsprogramm het me zügig dürechönne und beschlosse, dass mer am Eidgenössiche ds Basel wärde teilnäh.

Zure agnähme Zyt het der Presi sini zähti Houptversammlig chönne schliesse, so dass me no chli gmüetlech het chönne zämehocke.