Üse Jodlerobe steit vor dr Tür! Am 11. u 12. Apriu 2014, Friti 20.00 u Samschti 14.00/20.00 Uhr, füehre mir mit üsne Gaschtformatione dr aujährlech Jodlerobe düre. Zämä mit üsem engagierte Dirigänt em Res Frank hei mir es Chörbli mit farbige, fröhleche u ungerhautsame Lieder zämegsteut, wo öich für ne Momänt usem Autag söu usehole. Natürlech dörfe ou üser Gaschtformatione nid fähle. Am Friti Obe hei mir Bsuech vom Tschiferli-Cherli Kägiswil, am Samschti Nomittag git dr Jugendjodlerchor Langnou sis Beschte u am Samschti Obe fröie mir üs ufe Jodlerklub Bärgglöggli Steinhuserberg. Ahschliessend a das früehligshafte Konzärt hei mir ou für beschti Ungerhautig u Tanzmusig gsorget. Am Friti Obe isch das üses bekannte Schwyzerörgeli Quartett Lehmann vo Choppige, am Samschti Nomi d`Nachwuchsörgeler vo Langnou u am Samschti Obe s`Schwyzerörgeli-Quartett Hiubi Chiubi. Überlegit nid lang, chömmit cho inelose, löht nech loh verwöhne vo de schöne Liedervortreg wie ou Kulinarisch u gniessit es paar folkloreschi Stunde mit üs ir Gartebouschuel Oeschberg. D'Platzreservation isch ab sofort unger dr Nummer 034/413 17 20 jewils 18.30-20.00Uhr. Mir fröie üs uf öich!!! Sunnegi Grüess öiie Jodlerklub Bärgbrünneli