Ahfangs Oktober hei mir üs ufene bsungregi  Yladig gfröit. D'Rockband "Excelsis" het nämli s'ganze Wucheänd vom 2.-4. Oktober 2015 ihres 20 jährige Bestoh chönne fyre.

Bi wunderbarem Sunneschyn hei mir üsi Lieder zum Beschte gäh, während d'Bsuecher es grossartigs Zmorge hei chönne gniesse. Es isch e spezieue Ahlass gsi, wo mir  hei dörfe teunäh- eh jo, für üs Jodler isches nid eso autäglech, vor houptsächlech schwarzkleidetem  Publikum chönne z'singe. Aber es isch e Fröid gsi z'gseh wie die Manne, Froue u Ching  vor Glasseheit u Zfrideheit nume so gstrahlet hei.

Am Nomittag  hei du mir d'Müglechkeit gha für ihri Musig z'lose u bi de Bands goh mitrocke. Aber ou d'Chraft hei mir bim Boumstammwärfe natürli i de schönschte Chleider no müesse mässe...

Mir bedanke üs ganz härzlech bi de Initiante vo däm Fescht, wo üs mou chly e angere Uftritt ermüglecht hei u fröie üs uf "d'Muni-Sieche" wo a üsem Chilekonzärt wärde teunäh.