Wo mir vernoh hei, dass  d'Familie Mutzner e CD macht u mir de a ihrer Vorstellig am 6. Novämber 2015 dörfe derby si, isch das e grossi Fröid gsi für üs! Het doch dr Jodlerklub Bärgbrünneli Choppige e rächt ängi Beziehig zu Mutzners. Dr Marco het  chly meh aus 20 Johr bi de Bärgbrünneler mitgsunge u dervo het är 9 Johr s'Amt aus Präsident gfüehrt. D'Margreth, isch 5 Johr bi üs Dirigäntin gsi, d'Flurina het 5 Johr gjutzet u mit dr Sereina zämä jewils d'Asag gmacht a üsne Jodlerobe. Dr Pädu isch geng wieder im Hingergrund die gueti Seel gsi mit sim Mitwürke i dr Jodlerbar u serviere.

 I d'Chile Signou het a däm Obe üse Wäg gfüehrt. Dr Pädu het dä gmüetlech Obe eröffnet. Ungerstützig het är vo de zwöi Aebi Ching, Melanie u Lukas übercho u sie hei mit Fröhlechkeit u Witz düre Obe gfüehrt. Mir Jodler u aui wo mit Mutzners si gspannt gsi uf die nöii CD, hei während em ganze Obe e Huufe erfahre, wie u würum die CD entstange isch. Es würd ke bessere Name aus " uf üsem Wäg" passe. Dr Hingergedanke vo Mutzners isch nämli gsi, die CD mit au dene Lüt z'gstalte wo seie ufem Jodlerwäg bis dohäre, wo sie itz stöh, begleitet hei.  Wäge däm isch ou s'Schwyzerörgeliquartett Lehmann vo Choppige mit de schönschte Stück druffe, do seie u Mutzners   Wäg scho gly zämägfüehrt het. Dr ganz Obe het e rote, härzleche Fade gha u d'Chile isch mit viu Wermi u Dankbarkeit gfüllt worde.

Mir danke u gratuliere ar Familie Mutzner u aune wo uf dr CD z'ghöre si, no einisch vo ganzem Härze u wünsche öich aune wyterhin viu Erfoug u Fröid mit dere wunderschöne CD, am Singe u Musiziere.