Do isch aube e längi Vorbereitigszyt, Sache zum Organisiere u Plane das de aues guet chunnt u schön usgseht u mir müglechscht viu Lüt chöi gluschtig mache für üs cho z'bsueche u lose. Üses Johreskonzärt. Schwupp hets gmacht u die drü Konzärt si verby gsi.

Am letschte Friti u Samschti hei mir Bärgbrünneler e erfoug- u abwächsligsryche Jodlerobe dörfe dürefüehre. Bsungers stouz si mir, dass mir s'erschtmou üses nöie Bühnibiud hei dörfe präsentiere. Gmale het das Kunschtwärk d'Kathrin Dähler. Es het üs fescht gfröit, dass mir so viu Lüt bi üs hei dörfe begrüesse.

Mir Jodlerinne u Jodler hei a üsem Jodlerobe 6 Lieder u e Zuegab zu üsem Beschte gäh. S'erschte "Bärgwanderig" vom Ueli Moor hei mir bereits am Jodlerfescht z'Hasle-Rüegsau gsunge. De isches wytergange mitem "E Wunsch" vom Robert Fellmann üsi Solischte dr Res, Ueli u Küre hei ihri Stimme loh glänze. "d'Lüt im Dorf" vom Kurt Mumenthaler, "das cha nur Liebi si" vom Ueli Zahnd, bi däm Lied hei dr Ronni u dr Dominik mou so richtig chönne zeige was sie druf hei u so es warms Solo über d'Liebi beschribe. Wyter isches gange mitem "Enzischwand-Jutz" vom Franz Stadelmann und zu guter Letzt miteme no nid auzu bekannte Lied "z'Sunnebörtli" vor Therese Aeberhard-Häusler. Aus Zuegab hei mir wiedereinisch dr "Muni-Jodu" vom Alex Eugster füregnoh.

Us üsne Reihe hei mir das Johr ou e Solo-Jodlerin gha. Am Samschti Nomittag u Samschti Obe het d'Monika Lustenberger  mit ihrer glanzvoue u chreftige Stimm s'Lied "s'Singe macht mi froh" vom Ruedi Renggli vortreit. Begleitet uf dr Handorgele het seie d'Marlis Arn.

Friti u Samschti Obe het üs d'Jocelyne Moser mit ihrer ufgsteute u humorvolle Art düre Obe gfüehrt. Immer wieder het sies verstange mit Witz die Ungerhautig z'umrahme. Am Samschti Nomittag hei mir Ahsag-Nachwuchs vom Andrin Leuenberger gha. Ou är het mit sire fröhleche Art die Uftritte kundgäh u d'Lüt zum Lache brocht. Härzleche Dank dene zwöine!

Am Friti Obe hei mir s'Chrobeg-Chörli vo Gonte dörfe i Empfang näh. Rund 17 Manne hei i ihrer Appenzellertracht Rugguseli, Zeuerli u Appenzellerlieder mit ihrene schöne Stimme i Saal zouberet. Dr Appenzeller-Humor hei sie ou grad mitbrocht u mit mängem Witz d'Lüt loh schmunzle- ömu die wo dr Dialäkt verstange hei. Vor, während u nachem Konzärt het üs s'SQ Räbloch mit lüpfiger Musig ungerhaute, mängs Tanzpaar isch goh es Tänzli mache u so zum Schwitze cho.

Am Samschtinomittag hei mir bsuech gha vo 24 fröhleche Ching. S'Chinderchörli vo Wynige unger dr Leitig vor Rita Luschti, het üse Nomittag verschöneret. Mit ihrne läbhafte u schöne Tön hei sie am einte oder angere es Fröideträndli is Oug drückt. D'Örgelistärne, das si drü flotti Örgelischüelerinne vor Marianne Kämpfer us Dürrenroth, wo üs Jodler zwüsche de Lieder chli hei loh verschnuufe. Sie hei gwüsst wie sie die vile Chnöpf mit ihrne flinke Finger müesse chutzele, so dass sie s'Publikum mit ihrer lüpfige Musig zum Stuune hei broocht.

Gly druf si mir i üses Samschtiobe Jodlerobeprogramm gstartet. A däm Obe hei mir dank em Ruedi, Oberländer bi üs dörfe begrüesse. Dr Jodlerklub Gruss vom Wasserngrat us Gstaad het dr Wäg unger d'Reder gnoh für mit üs dä Obe z'gstaute. Sie hei chräftegi Stimme die Froue u Manne u dä schön Chorklang isch aune Ufgfaue. Wär gar nüm wägz'dänke isch u eifach e chly zu üs ghört, isch s'SQ Lehmann vo Koppigen. Wie jedes Johr hei sie ihre Power mitbrocht u so viu tanzfröidegi uf d'Bühni glockt fürs Bei zu ihrer rassige Musig z'schwinge.

Was a üsem Jodlerobe afe chly bekannt isch, isch dä fein Chemibrate mit Härdöpfugratin oder d'Hammesandwiches wo furt göh wie warmi Weggli. Was d'Lüt aber no nid hei kennt, isch das wunderbare Turtebuffet wo drei Jodlerfroue zouberet hei. 22 Turte hei sie mitbrocht, fasch jedi angers u schöner aus die angeri u d'Schläckmüüler hei se gliebt. Danke viumou öich Bäckerinne.

Was natürli ou nid darf fähle, isch die viusytegi u vo de Lüt gschätzti Tombola u d'Bar. Woby d'Bar nümm so guet bsuecht wird wie angeri Johr, wird me müesse drüber diskutiere obsech die no lohnt.

Itz möchti mir aune fliissige Häufer u Häuferinne uf däm Wäg no einisch vo ganzem Härze danke säge- ohni öich giengs nid u mir schätze jedi Ungerschtützig sehr!