Am Sunnti dr 22. Mai het s'Jodlerträffe untere Emme stattgfunge. Dr Jodlerklub Aeflige, wo das Johr ou ihres 75 Johr Jubiläum darf fyre, het die Klubs i Saalbau uf Kirchberg yglade. Nacheme feine Zmittag mit Würscht u Härdöpfusalat isches losgange. D'Corinne wo dürs Programm het gfüehrt, het üs aui mit ufene spannendi Wanderig gnoh. Nachem Gsamtchorlied "Häb fröid am Läbä" vom Ernst Sommer, si mir z'Hettiswil gstartet, de si mir zu üs uf Choppige gwanderet, dert hei mir d'Lieder "s'Sunnebörtli" vor Therese Aeberhard-Häusler u "d'Bärgwanderig" vom Ueli Moor gsunge, wyter isches gange zum Schützenchörli Kirchberg, zu de Jungjutzerli untere Emme u de zum Jodlerklub Aeflige, wo mir aui afe e Pouse hei gmacht. Nachem Verschnuufe si mir wyter gwanderet zum Jodlerklub Lyssach, Mötschwil, Utzenstorf, ueche zur Jodlergruppe Grotteflueh Ochlenberg, wieder chly id'Nöchi zum Jodlerklub Wiler u schliesslech zrügg i Saalbau wo mir aui die interessanti Wanderig mitem Gsamtchorlied "Jung sy" vom Adolf Stähli abgschlosse hei.

Es isch e gmüetleche Nomittag gsi z'Kirchberg, u mir danke am Jodlerklub Aeflige für die tolli Organisation!