Wie jedes Johr, hei mir ou im 2016 üses Schopffescht düregfüehrt. Was angers isch gsi isch dr Name, bis itz het dä Alass nämmli Platz-Konzärt gheisse, aber wüu mir das Ganze immer im Schopf vom Stettler Ruedi dörfe ha, hei mir döm Fescht e nöie Name gäh.

S'Wätter hets guet gmeint mit üs, bi warme Obesunnestrahle hei die feine Düft nach grillierte Steaks u Würscht viu Lüt zu üs i Schopf glockt. Es isch de aube ou grad es Dankeschön a aui Häufer, wo üs am Jodlerobe so tatchräftig ungerstützt hei. Zwüsche de Lieder wo mir gsunge hei, het dr Walter Badertscher u dr Willi Lehmann mit de Örgeli für gmüetlechi Ungerhautig gsorget. Es isch einisch meh e glungne Obe gsi u mir danke üsne Häufer vom Jodlerobe no einisch vo ganzem Härze u natürlech ou aune angere Gescht wo üs bsuecht hei- schön sit dir zu üs cho!