Letschte Samschti am 18. Juni hei mir e Bus u paar Outo gfüut u si i Richtig Oberland gfahre. Dank familiäre Zämehäng vom Garius Res si mir dert bim Jodlerklub Blüemlisalp yglade gsi für d'Ungerhautig a ihrer Chilbi mitzgstalte.

Es het viu Lüt ufe Schuelhusplatz glockt, aber mir hei üs loh säge, we de s'Wätter schön wär gsi, hätte sie de no viu meh Bsuecher gha. Mir hei e Hampfele Lieder zu üsem Beschte gäh u hei du aber ou dene schöne Mannestimme vom JK Blüemlisalp u de flinke Finger vom junge Schwyzerörgeliquartett Furgiblick dörfe zuelose. Wär het möge isch goh s'Tanzbei schwinge, isch i dere gmüetleche Stimmig no chly blybe höckle oder isch no i dr Bar goh ineluege.

Mir danke am Jodlerklub Blüemlisalp Scharnachtal vo ganzem Härze, für d'Gaschtfründschaft u das mir die Chiubi bi öich hei dörfe miterläbe!