Am Friti dr 4. Novämber hei mir Bärgbrünneler s'erschtemou es Soujasset ir Gartebouschuel Oeschberg düregfüehrt. Mir hei fröid gha, hei mir doch 72 Amäudige vo de Teunähmer dörfe entgägenäh.  Gäge die Sächsi si die Jasser u Jasserinne itrudlet u hei es feins Znacht mit Wurscht u Nüdeli chönne gniesse. De isches losgange. Mitem Initiant Ueli Neuenschwander u em Jassleiter Walter Habegger isch das Soujasset eröffnet gsi. Vo itz ah hetme nume no konzentrierti Gsichter gseh, mängisch mit Runzele aber de ou wieder mit eme Lache. Zu guter Letzt isches um d'Rangverkündigung gange. Die erschte drü wo hei dörfe useläse isch dr Burri Alain vo Rüedtligen, dr Brunner Roland vo Tscheppach u aus dritts üses Meier Käthi vo Burgdorf gsi. Schön zwäggmachti Fleischprise vom Garius Res hei aui Jasser u Jasserinne dörfe entgägenäh. Es isch e zfridnige Obe gsi- u bestimmt nid dr letscht Soujasset wo mir Jodler düregfüehrt hei.