I ha ne schöni Chappe anne,

us Wule, mit zwe Zöttle dranne.

Wenns dusse schneit, dass Gott erbarm,

de ha se gärn, de git sie warm.

Mit däm Gedicht u no mit Paarne angere, het üs d'Evelyne Ruef düre chaut Obe ir warme Chile vo üsem Wiehnachtskonzärt gfüehrt. Gmüetlech isches gsi, bi Cherzeliecht, warme Tön vo de Jodler u Jodlerinne, fini Cherli vo de Blockflöte u wiehnächtlechi Wort vor Evelyne.                   

D'Chile het sech a däm 2. Advänt fasch bis ufe letscht Platz gfüut u mir Bärgbrünneler hei dä Obe mitem Lied "Bärglerfründe" vom Adolf Stähli dörfe eröffne u de no wyteri 6 Lieder wo s'Härz erwärmt zu üsem Beschte gäh. Das Johr hei mir Gescht vo Lyssach u Jegenstorf dörfe begrüesse. S'Jodlerquartett Enzian het mit ihrne häue Tön u passende Lieder d'Chile erfüut. Vier Froue vom JeBlof, Blockflötenensemble Jegenstorf, hei ahspruchsvoui Tön i d'Chile zouberet u für Abwächslig  gsorget, wome so nid grad überau ghört. Üs hets tüecht, dä Obe heig aune guet toh, für ar Hektik im Autag e chly z'flieh u die bsinnlechi Adväntszyt chönne z'gniesse.

Nachem Konzärt hets verusse es Glüehwy oder es feins Tee gäh u wär de no het möge, het dr Obe im Rest. Löwen Niederösch bim gmüetleche Zämesi loh usklinge.