Letscht Friti am 20. Jänner isch bereits üsi Houptversammlig über d’Bühni. Im Gasthof Chrüz Höchstette, hei mir zum Ahfoh es feins Menue mit Salat, Rahmschnitzeli mit Nüdeli oder Pommes dörfe gniesse.

Am 20.15 het üse Präsi die ordentlechi HV eröffnet u zum Ahfoh hei mir s’Lied «Es treichelet Heizue» von A. Gugler ahgstumme. Es het audergattig z’informiere u z’diskutiere gäh. Erfreulecherwys het üse Kassier dr Röbu d’Johresrächnig miteme Plus chönne abschliesse. Zum Dank vo villne Spänder!

Dr Chrigu het nomou mit viu Witz u guete Wort uf üses vergangene Vereinsjohr zrügg gluegt. Jo, viu schöni u unvergässlechi Momänte hei mir dörfe erläbe. Aber ou truuregi Ougeblicke hei mir gha. Was är immer wieder betont, isch dr guet Zämähaut i üsem Klub- jo das isch nid säubverständlech!

Leider het är ou zwe Ustritte müesse bekannt gäh. Zum einte isch das dMonika Lustenberger üsi 1. Jutzere wo us private Gründ nach 3 Johr zrüggträtte isch u zum angere isches üse Hans Hofer wo autershauber usem Klub geit. 33 Johr isch dr Hans i üsem Klub gsi, het mängs Höch u Töif erläbt u het mit sim guete Humor immer wieder für uflockerig gsorget. Danke öich zwöine für die Zyt wo mir mit öich hei gha. E Ernöierig gits ou im Vorstand. Nach 4 Johr Vize Präsident het dr Ruedi Moser dr Rücktritt vom Vorstand bekannt gäh. Danke Ruedi für au dini Arbeit wo du gmacht hesch! Mit grossem Applous isch a sini Steu dr Silvano Hofer gwähut worde. Mir wünsche ihm viu Muet u Fröid a sim nöie Ämtli.

Nach de Ehrige vo de fliissige Probebsuecher u nachem dürenäh u diskutiere vom Tätigkeitsprogramm, isches bereits langsam aber sicher am Ändi zugange. Mitem «Enzischwandjutz» het dr Präsi üsi Hv abgschlosse u mir fröie üs ufenes intensivs, interessants u lebändigs nöis Vereinsjohr.