Die ganzi Vorbereitig für üses 50-Johr Jubiläum u für s’34. Jodlerträffe untere Emme louft bereits uf Hochtuure.

Üse OK- Präsi dr Kurt Jacquemai, s’ganze OK-Team mitem Klub im Rügge, si fescht bemüehit es gmüetlechs, unvergässlechs Fescht uf d’Bei z’steue.

Reservierit öich das Wucheänd vom 27./28. Mai 2017 bereits hüt.

Am Samschti hei mir s’Schäferchörli Nordwest, d’Jodlerfamilie Leuenberger Eggiwil, SQ Lehmann u dr Sepp Breitenmoser z’Gascht. Am Sunnti chöit dir sämtlechi Liedervortreg vo de Klubs vor untere Emme gniesse.

Mir fröie üs bereits hüt uf das Fescht u öich dert dörfe z’Begrüesse!