Am zwöite Sunnti im Dezämber hei mir üses Chilekonzärt düregfüehrt.

Dasmou hei mir bereits uf die füfi yglade. Ar vou bsetzte Chile ah het sech zeigt, dass üsi Bsuecher u Bsuecherinne a däm chaute, verrägnete Sunnti gärn chly früecher i die mit Cherzelicht gfüllti Chile si cho.

Aus Gescht hei mir d’Geschwister Moser usem Rüegsbach u s’Auphornduett Ämmitau yglade gha.

Die klangvoue, junge Jodustimme u die warme, ydrückleche Auphorntön hei zu üsne Jodulieder e wunderbari beriicherig gäh. Es isch e schöni, gmüetlechi u gnussvoui Stimmig dür d’Chile zoge.

Nachem Konzärt hets es warms Glüehwy oder Punch gäh, bevor sech üsi Gescht ufe Heiwäg oder ufe Wäg i Löie Niderösch gmacht hei füre Obe loh uszklinge.