We aube dr Schlusshöck bi üs Bärgbrünneler ahgseit isch, de neigt sech s’Johr langsam aber sicher am Ändi zue.

Das Johr isch dr 1. Tenor a dr Reihe gsi mit organisiere. Gäge die sächsi si die erschte ytrudlet zum Schuttihüsli z’Choppige u si mit feinem Glüehwy, Wy, oder Bier u Snacks empfange worde. Bereits dert het d’Gmüetlechkeit ahgfange, wo mir mit üsne Partner, Partnerinne u Ching um die warmi Füürschale gstange si u üs ahgwermt hei.

Im grosszügige Vereinshuus hei mir Fleisch parat gmacht gha, wo jedes die Qual der Wahl het gha für si Spiess z’bestücke u ahschliessend dusse ufem Grill säuber z’grilliere. Eso hei mir doch aui d’Müglechkeit gha mitem einte oder angere e Schwatz zmache u zwüschine chly z’verdoue.

Schön u gmüetlech isches gsi, mir hei sogar no dreine Manne zumene runde Geburtstag chönne gratuliere wo sie im 2017 gfyret hei. Am Fritz Buri u am Ernst Meyer zum 70-ischte u am Stefan zum 50-ischte. No einisch- aues Gueti. Für Abwächslig hei mir e Schätzwettbewerb gmacht, wo drei Gwinner es feins Znüni oder Gmües hei chönne mit heinäh. Natürli hei mir ou s’Singe nid ussegloh u so hei mir e gmüetleche u zfridnige Usklang vom 2017 gnosse.

Aune es härzlechs Dankeschön wo si derby gsi, aune wo es feins Dessert hei gmacht, süsch öppis bygstüüret hei u natürli ou dene wo dä Obe finanziell ungerstützt hei-MERCI VIUMOU.