Bi wunderbarem Früehligsduft, hei mir Bärgbrünneler am 6. und 7. April üse Jodlerobe chönne dürefüehre.

Mit em Lied «mis Plätzli» vom Adolf Stähli hei mir dr Konzärtteil eröffnet, het doch ou jede Gascht bi üs es Plätzli gfunge gha für chly zrüggzlige u die verschidene u wohutuende Tön e Momänt lang chönne z’gniesse.

«Am Sunne-n-egge» es Lied us de Fädere vom Robert Fellmann isches wyter gange, gfolgt vom «s’Plange» (Therese Aeberhard-Häusler) «Johr y Johr us» (Mathias Zogg), «Dachdeckerjutz» (Fredi Wallimann) u zu guter Letzt « Herbschtmelodie» vor Miriam Schafroth.

Natürlech hei ou üser Gescht nid dörfe fähle. S’Jodlerchörli Wyssache, dr Jodlerklub Meiringen und d’Jungjutzerli untere Emme hei je ame Konzärt ihres Beschte gäh u mit ihrene

schöne u abwächsligsryche Tön üses Konzärt berycheret- no einisch härzleche Dank!

Eröffnet u de mit lüpfiger Musig zum Tanz ufgspielt het je ame Konzärt s’Schwyzerörgelitrio «aube einisch», üsi Stammusig s’Schwyzerörgeliquartett Lehmann und am Sanmschti Nomittag d’Örgelifründe Chrützholz. Ou öich no einisch e grosse Dank für öii rassigi Musig.

Mitem abhole vomene schöne Tombolaprriis, bi öppis feinem Ässe oder Trinke oder miteme Schwank i üses Bierzäut, isch de üse Jodlerobe mit viune zfridnige Lüt u ere gmüetleche Stimmig bereits wieder usklunge. A dere Steu ou es grosses MERCI a au üser Gescht, es isch schön voreme fasch voue Saal dörfe z’singe. U ou es grosses DANKESCHÖN a au üser Häuferinne u Häufer, wo üs immer wieder so tatchräftig zur Site stöh.