Am 29. Juli, ame troumhaft schöne Sunnti si mir vo de Stechelberg-Jodler yglade worde, für d’Ungerhautig ar Allmendhubel-Chilbi mitzgstaute.

Am Morge früeh hei mir mitem Klub u üsne Familie ufs Schilthorn e überus feine Brunch chönne goh gniesse. Mir si überwältiget gsi vo dere troumhafte Bärgwäut. Die het üs bi Luune gha u so si mir singend id Gondle gstige u e Kursänderig gäge Allmendhubel vorgnoh. Dert si mir fründli miteme Glesli Wysse empfange worde u hei düre Nomittag hie u do es Ständli  dörfe gäh. Schön isches gsi bi öich, bsungers ou s’singe mit öich zämä! Tuusig DANK für öii Gaschtfründschaft. Mir dänke gärn a dä Sunnti zrügg u si bestimmt nid s’letschte Mou im Luterbrunnetal gsi!