Am Samschtimorge, 14. Oktober hei mir üs z Choppige besammlet. Mir aui si sehr gspannt gsi, wo ächt üsi Reis härefühert? Dr Ueli Neueschwander het organisiert u nid viu verrate, wohäre dass es geit. Mir träffi de ä "aute, gmeinsame Bekannte"... Hmmm.. wär chönnt ächt das si?

Mir si de i dä wunderbar Zysset-Bistro-Car ygstige u los isch's gange.. sogar Kafi u Gipfeli hei mir i däm Car dörfe gniesse! Üse Chauffeur, dr Roland Beyeler isch uf d'Outobahn Richtig Züri u när z'St. Gallen-Winkel drab u gägem Appizäu zue. So langsam aber sicher hei mir de gmerkt, wär dä «Bekannti» chönnt si.. Richtig, dr Appizäuer Alpenbitter isch aune vo üs bekannt ;-) teune chli besser u teune chli weniger i gueter Erinnerig... Dert acho, hei mir ä sehr spannendi Füehrig dörfe erläbe u wüsse jtz, dass Appizäuer früecher "ärztlich empfohlen" isch worde. Drufabe hei mir de die Medizin natürli ou degustiert!

Nachhär hei mir de s'Stedtli Appizäu no chli erkundet, eis gsunge u öppis feins Zmittag g'ässse, bis es de witer isch gange Richtig Schaffhausen. Dert si mir über Gränze u gägem Südschwarzwald zue. Dr Landgasthof Rebstock in Stüllingen isch üses Etappeziel vom 1. Tag gsi. Nachem Zimmerbezug hei mir s'huseigene Museum dörfe besichtige, viu hets gäh z'bestuhne, auti Traktore, Maschine u Wärchzüg, sogar die elektrischi Oma hei mir glehrt kenne. Was das isch, gseht dir uf de Föteli ir Galerie. Nachem Apéro dusse, si mir de ine züglet für goh Znacht z'ässe. Äs würkli feins Menue hei sie üs dert zäme gsteut. Jo u de si mir natürli aui müed gsi u si gly goh lige… Nei sicher nid, luschti isches zue u här gange. Mir hei gliedet u gjutzet u plötzli het dr Roland üse Chauffeur no siner Örgeli füre gnoh. Eh wie isch das ä schöne u gmüetleche Obe gsi! Wo de d'Wirtslüt hei weue Fürobe mache, si mir de haut ou is Bett.

Am Sunndimorge het üs de äs feins u riichhautigs Zmorgebuffet erwartet. Nachdäm hei mir üs de uf d'Witerfahrt zwäg gmacht, äs isch wieder über d'Gränze gäge Hallau zue. Dert si mir vor Familie Keller erwartet worde. Üses nächschte Vehiku isch de dr Räbe-Bummler gsi, mit däm si mir dür d'Räbbärge vo Hallau chauffiert worde. Viu Intressants übere Räb-bou u Winzerei aber ou über d'Gägend Klettgau hei mir erfahre. Bimene Zwüschehaut hei mir de ou vo dene feine Tröpfli dörfe probiere.

Zrügg bim Hof vor Familie Keller hets de äs feins Wysüppli u när ä Winzerwurscht mit Härdöpfusalat gäh, derzue natürli ou vom Wy wo sie säuber produziere. No äs Zytli si mir dert blibe u hei no chli gsunge, bis mir üs när ufe Heiwäg hei gmacht. Über Höger u Gägende wo nid aune so bekannt si, si mir gfahre, aber dr Roland het üs souverän ume gäge Choppige zue bracht.

Ä sehr schöni, intressanti u luschtegi Jodlerreis hei mir dörfe erläbe! Danke Ueli u Ruth für d'Organisation u ou üsem Chauffeur am Roland äs grosses Merci! No lang wärde mir a die schöni Jodlerreis zrügg däiche!