Am 22. Juni hei mir üs vouer Vorfröid ufe Wäg is Wallis, nach Raron gmacht. Veiechli ä Tschuppele het sich am Bahnhof Wynige besammlet u när sy mir mitem Zügli gstartet. Uf em Wäg dert häre isch natürli das grosse Unwätter wo am Fritig s'Wallis het heimgsuecht äs Thema gsi, wie wird äch s'Wätter dert sy? Mir sy uf jede Fau guet greist u z'Raron vo dene wo mitem Outo gange sy, erwartet worde. D'Sunne het gschunne u äs het ume chli Wulche gha. Gmüetlech sy mir gängem Jodlerdorf zue glüffe u hei de nachem Gepäck deponiere, afe einisch Haut gmacht im grosse Feschtzäut. Ganz nachem Motto, afe einisch i Rueh acho, öppis trinke u chli feine Späck für d'Stimm näh. Nachhär sy mir de gäge dr Burgchiuche zue, wo mir am 13.20 Uhr üse Vortrag "Mys Älpli" vor Margit Inäbnit hei vortreit. Ä wunderschöni Chiuche obe am Hoger, isch aber no veiechli asträngend gsy dert ueche z'cho! Chli verschnuufe u när goh ysinge. U de isch Zyt noche gsi für üse Vortrag. Ä luschtegi Ansägerin hei mir gha u sie het üs de im wunderschöne Walliserdialäkt agseit. Äs het üs düecht, üs sig das Lied no veiechli guet glunge, aber was es de fürne Note git, het gloubi niemer chönne säge. Chunnt jo de am Sunndi us.. Vo jtz a hei mir aber de das Fescht i voue Züg chönne gniesse u afe mou äs Appizäuer näh uf üse Vortrag.. jo u wie's so geit amne schöne Jodlerfescht, hei mir ou äs Glesli Wy oder zwöi oder ... gnoh. Guet ischer äbe scho, dä cheibe Walliser Wy. Ä luschtige Tag hei mir gha, do het ou dr Räge u s'Gwitter nüt a dere gmüetleche Stimmig möge trüebe. Viu gsunge u g'jutzet isch worde u ou am Ruedi 'sys' Gschänk wo är am Morge z'Wynige het übercho, isch zum Ysatz cho.. aber nid für das, wo's eigetli dänkt isch... aber luegit de uf de Föteli ir Galerie. Nachem feine Nachtässe bi de Lötschentaler isch de witer gange mit Feschte u Singe, äs paari vo üs sy sogar a Mitternachtsjutz. Eifach so schön, we so viu Jodler/inne zäme stöh u singe! Zu später Stung sy de ou die letschte vo üs goh schlofe, teu chli besser u teu chli weniger.. isch auso veiechli äs Schnarchkonzärt gsy i dere Zivilschutzanlag.. so het de dä nöii Tag agfange u eis nachem angere vo üs isch füre gragget u isch cho wyter feschte. Aber so langsam isch äs Kribbele ufcho u gspannt hei mir uf Klassierigslischte gwartet.. u de isch die usecho..

Juhuiiiii, mir hei äs 1 gmacht! Mir hei ganz ganz fescht Fröid u sy froh, het es üs glängt! Fröideträne sy äuwäg bi aune vo üs glüffe, DANKE Stefan! So u jtz hei mir no einisch ahgstosse u hei no wyter gfeschtet, bis es de nachem Mittag ume gäge heizue isch.

Mir Bärgbrünneler hei äs wunderschöns Jodlerfescht z'Raron dörfe gniesse u säge de Trägervereine ganz härzlech Danke für die super Organisation u die tolli u fründlechi Bewirtig, eifach hüerä güät! DANKE!