Am 08. Februar 2025 si mir vou Vorfröid i Campus Schwarzenbach-Huttwil gange. Mir hei nämli aue Grund gha, hei mir doch dörfe derbi sy, wo üse Fritz Buri zum Ehreveteran u üse Kurt Bichsel zum Veteran sy geehrt worde! Ehreveteran, das sy 50 Johr u Veteran 25 Johr. A dere Steu gratuliere mir am Fritz u am Küre ganz härzlech zu dere Leischtig! Bravo Manne, äs isch schön, sit Dir zwe i üsne Reihe!!

Da jo das ä Ehretag isch, hei mir mitem Klub ou dörfe s'Lied; "mys Älpli" vor Margit Inäbnit vorträge.

Jo u de sy mir no chly gsi u hei chli gfyret u gsunge. Äs isch ä schöne Obe gsy. D'Organisatore, dr Jodlerklub Sumiswald u d'Jodlergruppe Schaffhuse hei das sehr guet gmacht. Danke viu Mou! Mir sy sehr gärn derby gsy.