Am 10. u 11. Apriu hei mir üse Jodlerobe 2026 ir Gartebouschuel Oeschberg-Koppigen dörfe düre füehre

Scho gly sy die erschte Bsuecher cho, für vorgängig öppis feins us dr Chuchi vom Res Garius u sim Team z'gniesse, bevor üser Konzärt isch losgange.

Üser Gaschtformatione vom Fritiobe sy ds Schwyzerörgeli-Quartett Gugulüsch vo Kirchberg u dr Jodlerklub Hettiswil gsy. Mit rassiger Musig het s'Quartett Gugulüsch dä Obe eröffnet, so schön isches gsi dene lüpfige Tön chönne zuelose! Jo u de sy scho mir dranne gsy... flyssig hei mir unger dr Leitig vo üsem Dirigänt Stefan Müller die Lieder für Jodlerobe güebt u dra gfielet.. u so hei mir äs bunts u abwächligsriichs Liederprogramm zäme gsteut.

Dr Jodlerklub Hettiswil het mit ihrne wohlklingende Stimme u wunderbare Lieder dr erscht Jodlerobe vom Fritig abgrundet. Danke viu Mou, syt Dir bi üs gsy! Ou am Quartett Gugulüsch äs grosses Merci! Öii Musig het gfägt, gärn ume äs angersch Mou wieder!

Am Samschtinomittag isches de wyter gange; üser Gescht s’Jodlerduett Heimatklang u d’Ämmitaler Örgelifründe hei mit üs zäme ä abwächsligsryche Nomittag gstautet. Ä wahri Fröid, dene junge Stimme vom Duett u dr lüpfige Musig ve de Örgeler zue z’lose. Ou ihne äs grosses Dankeschön!

Am Samschtiobe hei mir Gescht üsem Bärner-Jura dörfe begrüesse, nämlech dr Jodlerklub Enzian Le Fuet sowie d’Schwyzerörgeli-Familie Lehmann vo Wynige. Sie hei dr Obe eröffnet u grad drei Generatione vo Lehmann’s hei zäme g’örgelet! Ä wahri Fröid!

Vo üsne Gescht usem Bärner-Jura hei mir ä Chäs gschänkt übercho, sie hei so Fröid gha, dass sie zu üs hei dörfe cho singe! Ou ihne u ar ganze Familie Lehmann äs härzlechs Dankeschön, sy sie bi üs gsy!

Nachde Konzärt vo de Öbe hei aui ihres Losglück bir Tombola chönne versueche, ässe u trinke oder no s'Tanzbei zur lüpfige Musig vo üsne Musikante schwinge. Mir hoffe, äs het für aui öppis passends derbi gha!

So, u jtz blybt ume aune Bsuecher, üsne tröie Häufer u natürlech am Stefan Müller z’danke! Wiu ohni Gescht, Häufer u Dirigänt wär sone Obe gar nid düre z’füehre!

Danke u bis gly wieder, Öier Bärgbrünneler