Scho ghört üses Chilekonzärt vom 07. Dezämber 2025 ume dr Vergangeheit a

Pünktlech ufe Gloggeschlag uf die 5i am Obe sy mir zäme gstange u hei ir vou bsetzte Chiuche üses erschte Lied "Ätti, sing mit mir" vom Bruno Mathys vortreit. Äs isch gäng ume ä Fröid, we so viu Bsuecher u Zuehörer chöme cho lose u luege! Aber mir hei jo ou hüür ganz hochkarätigi Gescht gha! S'Jodlerduett "Füf vor zwöufi", dr Stefan u Chlöisu Zürcher usem Ober-Ämmitau sy zu üs cho für mit üs zäme äs abwächsligsriichs Liederprogramm zum Beschte z'gäh. U üsi Yelena Buri, sie het üs aui überrascht; sie het "nid ume" mit em Cedric Wittwer dür's Programm gfüehrt, nei sie het ihres säuber komponierte Lied wo sie für ihri Abschlussarbeit vor Schuel het gschriebe, a üsem Chilekonzärt vortreit! So viu Muet, eifach alleini z'singe u jutze, do chöi mir aui ume dr Huet zieh! Bravo Yelena, mir hei fescht Fröid u sy stouz, steisch du i üsne Reihe!

So isch das Konzärt scho gly am Ändi zue gange u äs fröit üs, sy die Vorträg so guet bi üsne Zuehörer/inne acho! Ou we's no ä "Usflug" ufe Mischtstock het gäh.. eh jo, mit chly z'viu "Alkohol am Stüür" cha das vorcho.. Äs bitzeli Humor u Liechtigkeit duet doch ou i Zyte guet, wo's mängisch chly fyschter u trüeb isch.

Für aui wo nachem Konzärt no Zyt u Gluscht hei gha, het äs Glüehwy oder Punsch gäh u so het es no s'einte oder angere schöne Gspräch oder no äs spontans Liedli gäh..

Uf jede Fau möchti mir's nid ungeloh, am Stefan u Chlöisu ganz härzlech z'danke, hei sie dr Wäg uf Choppige gfunge u mit ihre wunderbare u humorvoue Vorträg üses hüürige Chilekonzärt beriicheret! 

Ä härzleche Dank a D'Chile Choppige, hei mir Gaschträcht i dr Chlile dörfe ha u natürli ä Öich liebe Bsuecher! Wüu ohni Öich wär's ume haub so schön. Mir wünsche Öich aune ä wunderbari Advänts- u Wiehnachtszyt u für's nöie Johr viu Gfröits, Glück u gueti Gsundheit! Bis scho gly ume..

Öier Bärgbrünneler vo Choppige