Am Samschtimorge 31. Mai hei mir üs ufgmacht nach Kandergrund a Adelli-Markt. Dert hei mir ä Gaschtuftritt gha.

Mir aui sy gspannt gsy, was üs de erwartet. Ä prächtige Tag uf jedefau u ä wunderbari Bärgwäut, aber süsch hei mir dä Märit no nid kennt gha. 

So sy mir dert acho u äs gschäftigs Triebe isch scho im Gang gsy. U de hei mir übere ganz Tag chly a verschiednige Orte, syg es bim Feschtzäut oder bir Buvette bim Wasserchraftwärch gsunge.

Mir hey zwüschine ou Zyt gha, dr Märit goh aluege. Viu intressanti Sache hets gäh, verschiedenschti Pflanze, säuber gmachti Sache wie Gschirr, Steihärz, Tonchugle, roschtigi Kunscht, feini Sache zum Ässe u no ganz viu meh. Intressant isches gsy, würkli! Äs feins Zmittag hets ou gäh u so hei mir ä schöne Tag dert verbrunge. Paar Sache hei mir natürli ou gänggelet, zum Bispiu äs wunderschöns Zittergras miteme heimleche Bewohner, ame härzige Schnäggli. Dä isch aber nid mit heicho, dä het dert äs schöns Plätzli übercho..

Am Obe isch de s'Bodensee-Quintett cho musige u mir sy no äs Zytli blibe u hei ghulfe, chli Stimmig z'mache. Das Quintett isch ä luschtigi Truppe gsy u sie hei aus gäh, für d'Lüt chli us dr Resärve z'locke

Jo u de isches ou für üs Zyt worde, dä schön Ort z'verloh u hei üs ufe Heiwäg gmacht, paari mitem Prvatouto u die angere mitem Mietbus, wo dr Pesche Bernhard souverän het glänkt. Im Bus isches de no luschtig zue u här gange u mir hei ou dert no wyter gsunge u Zyt isch schnäu düre 

Mir Bärgbrünneler danke für's Gaschträcht in Kandergrund, äs isch schön gsy, hei mir dörfe cho!