Am Friti, 4. Apriu 25 isches ume sowit gsi, dr 1. Jodlerobe isch vor dr Türe gstange.

Mit viu Fröid hei mir Lieder ygstudiert u hei de zäme mit üsne Gescht, em Jodlerklub Wüflingen und em Schwyzerörgeli-Quartett chummlig.ch dr erscht Obe gstartet. Trotz auem, dass ou süsch no viu los isch gsi, hei doch veiechli viu Lüt dr Wäg zu üs i Gartebouschuel gfunge.

Einisch chli ä angere Dialäkt ghöre bi de Lieder, das isch intressant, d'Wülflinger rede nid grad wie mir. Aber sehr schön hei sie das gmacht u äs isch ganz ä luschtige Huufe. We sie nid so ä wyte Wäg hätti gha, i gloube sie wäri gärn no lenger blybe. Ou chummlig.ch het lüpfig gpsiut u gmusiget, ä wahri Fröid! Öppe am haubi .. hets de Fyrobe gäh u mir sy heizue für de ume parat z'sy für am Samschti

Am Samschtinamittag 5 Apriu isches nämli scho witer gange mit üser Konzärtreihe. Mit de Fluehjutzer vo Oesch u de Ämmitaler Örgelifründe hei mir tatchräftegi Ungerstützig gha u trotz em schöne Wätter sy viu Bsucher cho. Äs isch jo ou wunderbar z'gseh, we so jungi Lüt üser Traditione wyter pflege. 

U de isches gly Obe worde u scho hei mir dr Saal ume parat gmacht für üse 2. Obe. Gaschtklub dasmou isch dr Jodlerklub Heimisbach gsy u Schwyzerörgeli-Familie Lehmann het lüpfig Musig gmacht. Ou dasmou sy viu Lüt cho, jo gwüss ä voue Saal, das isch äbe schön! Äs isch äs glungnigs Fescht gsy u no lang nachem Konzärt im 2. Teu hets gjutzet u gsunge.

Mir danke aune üsne Gaschtformatione für z'cho u mitträge vo üsne Konzärt, üsne liebe Bsuecher u natürli au ünse tröie Häufer, wiu ohni sie wär aus ume haub so schön!

Mir fröie üs scho ufnes nächschts Wiederluege u bis gly