Wie jedes Johr chöme mir Jodlerklubs u d'Jungjutzerli vor Jodlervereingung ungeri Ämme zume Jodlerträffe zäme. Das Johr het das Träffe dr Jodlerklub Hettiswil düregfühert u yglade id Mehrzwäckhaue Ruedismatt, Krauchthal. 

D'Jungjutzerli und s'Jodlerduett Olivia und Sara, ou ä Nachwuchsformation, hei zum Afang gsunge. Äs isch eifach gäng schön, däm Nachwuchs dörfe z'lose u luege! De wär no äs wyters Duett ufem Programm gsy, het leider aber chrankheitsbedingt nid chönne ufträtte. Aber us däm Duett isch de spontan es Solo worde und Daniela Schmidiger het mit Örgeli-Begleit das souverän glöst, beydruckend!

Ganz erfröilech isch, dass dr Jodlerklub Heimat Alchenstorf das Johr aus Gaschtformation isch derby gsy und mir fröie üs uf wyteri schöni Zämekunft!

Äs schöns Träffe isch es gsi u so sy mir bi feiner Hamme u Härdöfusalat no chli zäme ghöcklet u hei öppe no s'einte oder angere Liedli zäme gsunge.

Mir danke de Hettiswiler für d'Organisation u fröie üs scho uf s'nächschte Zäme cho!