10. Koppiger Soujasset, das isch uf dr Yladig gstange u dere Yladig si grad exakt 100 Jasser/inne gfougt.

Für üs isches aber ä chlini Premiere gsi, so hei mir doch dä zum erschte Mou ir nöiie Mehrzweckhalle ir Bläji dörfe düre füehre. Mir sy scho chli ahgspannt gsi, klappet ächt aus? Finge d'Jasser dr Wäg? Louft ächt aus rund? Äs isch de aber aus sehr guet über Bühni gange, s'Ässe isch fein gsi; Gschnätzlets, Nüdeli u Gmües (isch im Startgäud inbegriffe gsi) hei mir us dr Chuchi vom Res Garius dörfe serviere. Pünktlech um 20.00 Uhr het de das Turnier gstartet. Äs isch agnähm gsi vor Lutsterchi, mir aui hei gäbig Platz gha u so isch das Verschiebe u Platz tuusche nach jeder Passe gäbig gange. Wo's gäge Ändi vo däm Turnier isch gange, sy die schöne Priise uftischet worde. So het es gwüss bis hinge use für aui Jasser ä schöne u gäbige Priis gäh zum heinäh.

Mir danke aune Jasser/inne wo üs bsuecht hei u fröie üs scho, we's de nächst Herbscht heisst; 11. Koppiger Saujasset ir MZH Bläji!