Am 08. Dezämber 2024 hei mir üses aujährlech Chilokonzärt dörfe düre füehre. Dasmou isch es ganz äs Bsungrigs gsi.

Mir hei nämlech Verstärchig gha vo üsne Projektsängerinne u Sänger. Für das Singrojekt hei sich gwüss paar Intressierti gmäudet u so hei mir ab Ändi Ouguscht agfange Lieder mit ihne yzstudiere. Motiviert hei mir flyssig güebt u so hei mir bis zu däm Konzärt äs schöns u abwächsligsrychs Liederprgramm zäme gha. 

Jo u de isch es sowit gsy, dr 08. Dezämber isch vor dr Tür gstange. Chli kribbelig sy mir gloubi aui gsi u de isch am Samschi leider d'Nachricht cho, dass üsi einti Gaschformation us gsundheitleche Gründ nid het chönne mitmache, schad! Aber üser Projektler u mir Jodler hei üs de nid loh us dr Rueh bringe, mir hei jo no ä zwöiti Gaschtformation gha wo üs hei ungerstützt. D'Munisieche vo Choppige hei üs ghulfe, äs schöns u abwächsligsriich Programm chönne darzbiete. Vore vou bsetzte Chiuche hei üser Projektlüt üs tatchräftig mit ihrne schöne Stimme ungerstützt! Dr Münggu u dr Könu vo de Munisieche hei mit ihrne bsungrige u nid autägleche Kläng vo Dudelsack u Houzchischtli/Trumle, schottisch-rockigi Musig gmacht u das isch bi de Zuehörer sehr guet acho! Mir hei s'Gfüehl, das Konzärt het gfaue, d'Rückmäudige sy uf jede Fau sehr positiv u erfröilech gsi!

A dere Steu möchte mir üs ganz härzlech by Vreni, Doris, Esther, Kathrin, Kobi, Fredy u Clemens bedanke! Dir aui heit das super gmacht u äs isch ä Fröid gsy, mit öich zäme das Projekt düre z'füehre! Ou ä grosse Dank geit a üse Dirigänt Stefan, är het mit viu Gspühri das Singprojekt zumene schöne u glungnige Abschluss brunge! De danke mir ou am Münggu u am Könu, hei sie mitghulfe, äbe äs bsungrigs Konzärt z'mache!