Am Friti 17. Jänner hei mir üsi Houptversammlig im Restaurant Rössli z'Utzenstorf gha. Äs feins Znacht hets vorab gäh; gmischte Salat, Gschnätzlets u Pommes-frites. Danke viu Mou a dere Steu as Team vom Rössli für die tolli Bewirtig!

Jo u de öppe um 20.00 Uhr het de die Houptersammlig gstartet. Veiechli viu Traktande hets gäh zum bespräche, was öppe so üblech isch a so Versammlige. Üse Presi het guet dür die Versammlig gfühert.

Erfreulecherwys hei mir üsi Yelena Buri dörfe aktiv i Verein ufnäh, härzlech wiukomme, liebi Yelena! Aber Du hesch jo üs scho fasch s'ganze Johr 2024 ungerstützt u bisch zum 1. Mou a üsem Jodlerobe 2024 mit üs uf dr Bühni gstange! Äs isch wunderbar, so jungi Gsichter i üsne Reihe z'ha!

Leider hei mir aber ou ä Übertritt vo Aktivsänger zu de Passive gha; dr Res Frank het leider gäng no mit syre Stimm/Stimmbänder Problem u är cha momentan nüme singe. So het är sich entschiede, nüme aktiv mitzmache. Mir danke Dir Res für di Ysatz bi üs u wünsche Dir aues Guete u gäng viu Gfröits, mir hoffe natürli dass mir Di zwüschine öppe gseh!

Ir Agände chame nocheluege, was mir fürnes Tätigkeitsprogramm hei, no veiechli viu Termine..

Jo u de git es no z'verzeue, dass mir am 08. Februar 2025 dr Fritz Buri aus Ehreveteran u dr Kurt Bichsel aus Veteran a d'Veterane-Ehrig vom BKJV uf Scharzenbach-Huttwil dörfe begleite u de ou dörfe äs Lied vorträge. Mir fröie üs scho ganz fescht!

Mir hei nöii jtz ou zwe Manne aus Ehremitglieder dörfe ernenne, dr Kurt Jacquemai isch sit 20 Johr aktiv im Klub. Ou dr Ueli Haueter isch mit chline Ungerbrüch zwüschine, sit 2001 aus Aktivsänger im Klub. Die zwe Manne hei ä schöni Tischuhr mit Gravur vo üsem Presi überreicht übercho. Härzlechi Gratulation zu däm Jubiläum Kurt u Ueli.

Jo u de hets no dises u äis gäh z'bespräche. Danke Chrigu für Dis Härzbluet u Ysatz aus üse Presi für dä Klub! Du machsch Dini Arbeit eifach super!

So hei mir de di Houptversammlig bim gmüetleche 2. Teu loh usklinge.